Gættu þess að byggja verkefnið á þessari lýsingu og réttri gagnaskrá. Verkefni breytast milli ára. Við getum ekki tekið gild verkefni byggð á gömlum verkefnislýsingum eða gögnum fyrri ára.
Gögnin sem eru notuð í þessu verkefni var safnað af mannfræðingi sem hafði áhuga á áhrifum áfengisneyslu á makaval á næturklúbbum. Hann taldi að huglægt mat á kynþokka yrði ónákvæmara eftir neyslu áfengis (svonefnd bjórhrif; beer-goggles effect). Einnig vildi hann kanna hvort kynjamunur væri á þessum hrifum
Upplýsingar um þessi áhrif áfengis á kynlíf og kynþokka má finna í Wikipediu en einnig má gera óformlegar athuganir á eigin vegum. Rétt er að geta þess að hið síðarnefnda er að fullu á ábyrgð viðkomandi nemanda, þessa helgi sem aðrar helgar ársins. Ef þú nú þegar stundar umfangsmiklar athuganir, er vert að kynna sér nokkur hollráð.
Þátttakendur voru 24 karlar og 24 konur. Rannsakandinn fór með þátttakendur í átta manna hópum á næturklúbb. Tveir hópar drukku (einn hópur kvenna og einn hópur karla) áfengislausan bjór (lyfleysuhópur), tveir hópar drukku tvo stóra bjóra (946 ml; 2 pints) og síðustu tveir hóparnir drukku fjóra stóra bjóra (1.893 ml; 4 pints). Í lok kvöldsins var tekin mynd af þeim sem þátttakendur áttu í samræðum við. Rannsakandinn fékk síðan óháða aðila til að meta kynþokka fólksins á myndunum á kvarðanum einn upp í 100.
Frumbreytur rannsóknarinnar voru kyn og áfengisneysla. Áfengisneysla (alcohol) tók þrjú gildi: Áfengislaus bjór (none), tveir stórir bjórar (2 pints) eða fjórir stórir bjórar (4 pints). Fylgibreytan var kynþokki (attract), það er hversu aðlaðandi viðmælandi þátttakanda var við lok kvölds. Sextán þátttakendur voru í hverjum hóp, átta konur og átta karlar.
Skiladagur verkefnisins er mánudagsmorgunn 9. nóvember nk. stundvíslega kl. 1000. Skila skal verkefninu í pósthólf í þjónustuborðinu í Gimli. Gættu að því að það eru tvö þjónustuborð, þetta þjónustuborð er í Gimli nálægt skrifstofu sálfræðideildar. Þú finnur bréfalúgu í hnéhæð vinstra megin við glervegginn og undir upplýsingaskjáum. Ef þú ert alveg á síðustu stundu, gæti verið skynsamlegt að rétta verkefnið yfir borðið og árétta skilafrestinn við þann sem tekur á móti.
Notaðu skýrslumátin sem hafa verið lögð inn í Uglu. Skilaverkefni sem eru ekki með staðlaða forsíðu, myndina af klukkunni, eru í aukinni hættu á að misfarast.
Nemendur geta varpað fram spurningum tengdum verkefninu og svarað öðrum nemendum á umræðuþræði á heimasvæði námskeiðsins í Uglu eða í stoðtíma föstudaginn 30. október nk.
Á umræðuþráðinn má setja spurningar og svör sem tengjast úrlausn á skilaverkefninu. Bergljót Gyða, stoðkennari, mun fylgjast með umræðum og koma inn í þær ef þurfa þykir.
Vinsamlega vandaðu til fyrirsagna á fyrirspurnum. Vel valin fyrirsögn vekur athygli bæði okkar og samnemenda og eykur því líkur á vönduðu svari. Við getum ekki lofað svörum við fyrirspurnum með fyrirsögnina Re: Skilaverkefni 3 eða álíka.
Við áskiljum okkur ritstjórnarvald sem felst m.a. í því að fjarlægja innlegg sem við teljum óviðeigandi eða sem tengjast ekki beint úrlausn verkefnisins að okkar mati. Vinsamlega sýndu þessu menntaða einveldi fullan skilning.
Gerðu vandaða og nákvæma skýrslu sem tekur á öllum eftirfarandi spurningum og viðfangsefnum. Byrjaðu á því að sækja SPSS gagnaskrána og vista hana á harða diskinn hjá þér.
Mest mega tveir nemendur vera um hvert skilaverkefni. Athugaðu: Þú mátt aðeins vinna skilaverkefni tvisvar með sama nemanda.
Verkefnið þarf að vera á APA-formi, þ.e. með Inngangi, Aðferð, Niðurstöðum og Umræðu.
Hefurðu skoðað leiðbeiningarblöðin sem heimasíða námskeiðsins vísar á? Þau reynast mörgum gagnleg við úrlausn verkefnisins.
©2009 Guðmundur B. Arnkelsson (síðast breytt 28. október 2009)