Verkefnið byggir lauslega á EESEE sögunni Stepping up your heart rate.

Gættu þess að byggja verkefnið á þessari lýsingu og réttri gagnaskrá. Verkefni breytast milli ára. Við getum ekki tekið gild verkefni byggð á gömlum verkefnislýsingum eða gögnum fyrri ára.

Hvernig hefur líkamleg hreyfing áhrif á hjartslátt okkar? Nemendur við Ohio State- háskólann í Bandaríkjunum rannsökuðu sambandið á milli tíðni hjartsláttar og uppstigs á pall. Þátttakendur voru 30 talsins.

Fylgibreytan var fjöldi hjartslátta á mínútu (púls eftir átök) en frumbreytan tíðni uppstigs á pall. Tíðni uppstigs var þrenns konar; 14 skref á mínútu (hæg), 21 skref á mínútu (miðlungs) og svo 28 skref á mínútu (hröð). Tíu þátttakendur voru í hverjum hópi.

Þátttakendum var haldið í takti með hljóði sem heyrðist í rafrænum klukkubúnaði. Einn rannsakendanna fylgdist með hverjum þátttakenda og mældi púls hans fyrir og eftir áreynslu.

Athugaðu að þessi lýsing er gróflega einfölduð og töluvert breytt frá sögunni í EESEE. Þetta er gert í því skyni að aðlaga gagnasafnið að efni og áherslum námskeiðsins.

Skil og tímamörk

Skiladagur verkefnisins er þriðjudagur 13. október nk. stundvíslega kl. 16⁰⁰. Skila skal verkefninu í pósthólf í þjónustuborðinu í Gimli. Gættu að því að það eru tvö þjónustuborð, þetta þjónustuborð er í Gimli nálægt skrifstofu sálfræðideildar. Þú finnur bréfalúgu í hnéhæð vinstra megin við glervegginn og undir upplýsingaskjáum. Ef þú ert alveg á síðustu stundu, gæti verið skynsamlegt að rétta verkefnið yfir borðið og árétta skilafrestinn við þann sem tekur á móti.

Notaðu skýrslumátin sem hafa verið lögð inn í Uglu. Skilaverkefni sem eru ekki með staðlaða forsíðu, myndina af klukkunni, eru í aukinni hættu á að misfarast.

Stuðningur

Nemendur geta varpað fram spurningum tengdum verkefninu og svarað öðrum nemendum á umræðuþræði á heimasvæði námskeiðsins í Uglu eða í stoðtíma föstudaginn 9. október nk.

Á umræðuþráðinn má setja spurningar og svör sem tengjast úrlausn á skilaverkefninu. Inga Dröfn, stoðkennari, mun fylgjast með umræðum og koma inn í þær ef þurfa þykir.

Vinsamlega vandaðu til fyrirsagna á fyrirspurnum. Vel valin fyrirsögn vekur athygli bæði okkar og samnemenda og eykur því líkur á vönduðu svari. Við getum ekki lofað svörum við fyrirspurnum með fyrirsögnina Re: Skilaverkefni 2 eða álíka.

Við áskiljum okkur ritstjórnarvald sem felst m.a. í því að fjarlægja innlegg sem við teljum óviðeigandi eða sem tengjast ekki beint úrlausn verkefnisins að okkar mati. Vinsamlega sýndu þessu menntaða einveldi fullan skilning.

Verkefnið

Gerðu vandaða og nákvæma skýrslu sem tekur á öllum eftirfarandi spurningum og viðfangsefnum. Byrjaðu á því að sækja SPSS gagnaskrána og vista hana á harða diskinn hjá þér.

Mest mega tveir nemendur vera um hvert skilaverkefni. Athugaðu: Þú mátt aðeins vinna skilaverkefni tvisvar með sama nemanda.

Verkefnið þarf að vera á APA-formi, þ.e. með Inngangi, Aðferð, Niðurstöðum og Umræðu.

Hefurðu skoðað leiðbeiningarblöðin sem heimasíða námskeiðsins vísar á? Þau reynast mörgum gagnleg við úrlausn verkefnisins.

Spurningar

1. Hvernig telur þú sambandi tíðni hjartsláttar og tíðni uppstiga ætti að vera háttað?
2. Lýstu gögnum myndrænt og með töflum. Er eitthvað sem stingur í augu?
   • Gættu þess sérstaklega að kanna lýsandi tölfræði fyrir allar breytur og að skoða dreifingu fylgibreytunnar myndrænt.
3. Framkvæmdu einhliða dreifigreiningu til að athuga samband uppstigs á palla og tíðni hjartsláttar.
   • Athugaðu forsendur einhliða dreifigreiningar.
     1. Er villan normaldreifð?
     2. Er villan einsleit?
     3. Eru einhver fráviksgildi (frávillingar; útlagar) til staðar sem gætu haft áhrif á niðurstöður?
   • Túlkaðu niðurstöður dreifigreiningarinnar, notaðu línurit yfir meðaltöl til að aðstoða við túlkun.
     1. Er munur á hjartsláttartíðni eftir því hversu hratt er stigið á pall?
     2. Ef munur er á meðaltölum hvar liggur sá munur? Slíkt getur þú athugað með því að gera eftir á samanburð.

© 2006–2009 Guðmundur B. Arnkelsson (síðast breytt 5. október 2009)