Gættu þess að byggja verkefnið á þessari lýsingu og réttri gagnaskrá. Verkefni breytast milli ára. Við getum ekki tekið gild verkefni byggð á gömlum verkefnislýsingum eða gögnum fyrri ára.
Rannsakendur í næringarfræði könnuðu m.a. tengsl hæðar og aldurs við þyngd unglinga. Þátttakendurnir voru alls 237 en þeir voru á aldrinum 11 til 21 árs.
Það er ljóst að hæð hefur áhrif á þyngd þar sem líkamshæð er mælikvarði á stærð líkamans og stærri líkami er að jafnaði þyngri en minni líkami. Áhrif aldurs eins og sér eru hins vegar ekki eins ljós. Með hækkandi aldri lengist fólk á þessu aldursskeiði en auk þess verða ýmis konar þroskabreytingar sem gætu haft áhrif á þyngd. Til að mynda má benda á að vöðvar lengjast og þykkna á unglingsaldri en þessi aukning í vöðvamassa hefur áhrif á þyngd manna.
Þú átt að kanna hver áhrif aldurs og hæðar eru á þyngd? Frumbreyturnar eru tvær, aldur og hæð, og fylgibreytan er þyngd. Aldur var mældur í árum, hæð í sentimetrum og þyngd í kílóum.
Við gerum ráð fyrir því að þú hafir þá bakgrunnsþekkingu á þeim breytingum sem verða á líkamanum á unglingsárum að þú getir fjallað um þessar breytur og hugsanleg tengsl þeirra í inngangi. Við búumst einnig við því að þú getir af þessum sökum túlkað niðurstöður efnislega og af einhverri dýpt og t.d. útskýrt hvort og að hvaða leyti þær koma á óvart eða eru í samræmi við væntingar þínar.
Skiladagur verkefnisins er mánudagsmorgun 28. september nk. stundvíslega kl. 1000. Skila skal verkefninu í pósthólf í þjónustuborðinu í Gimli. Gættu að því að það eru tvö þjónustuborð, þetta þjónustuborð er í Gimli nálægt skrifstofu sálfræðideildar. Þú finnur bréfalúgu í hnéhæð vinstra megin við glervegginn og undir upplýsingaskjáum. Ef þú ert alveg á síðustu stundu, gæti verið skynsamlegt að rétta verkefnið yfir borðið og árétta skilafrestinn við þann sem tekur á móti.
Nemendur geta varpað fram spurningum tengdum verkefninu og svarað öðrum nemendum á umræðuþræði á heimasvæði námskeiðsins í Uglu eða í stoðtíma föstudaginn 25. september nk.
Á umræðuþráðinn má setja fyrirspurnir og svör sem tengjast úrlausn á skilaverkefninu. Inga Dröfn, stoðkennari, mun fylgjast með umræðum og koma inn í þær ef þurfa þykir.
Við áskiljum okkur ritstjórnarvald sem felst m.a. í því að fjarlægja innlegg sem við teljum óviðeigandi eða sem tengjast ekki beint úrlausn verkefnisins að okkar mati. Vinsamlega sýndu þessu menntaða einveldi fullan skilning.
Gerðu vandaða og nákvæma skýrslu sem tekur á öllum eftirfarandi spurningum og viðfangsefnum. Byrjaðu á því að sækja SPSS gagnaskrána og vista hana á harða diskinn hjá þér. Þú getur einnig nálgast textaskrá sem hægt er að lesa inn í CrunchIt . Aðgættu þó að það getur verið töluvert óhagræði af því að nota CrunchIt til að kanna forsendur marghliða aðfallsgreiningar og því gæti SPSS hentað betur við úrlausn verkefnisins
Mest mega tveir nemendur vera um hvert skilaverkefni. Athugaðu: Þú mátt aðeins vinna skilaverkefni tvisvar með sama nemanda.
Verkefnið þarf að vera á APA-formi, þ.e. með Inngangi, Aðferð, Niðurstöðum og Umræðu. Gættu þess einnig að töflur og myndir séu á réttu formi, vísað sé í allar töflur og myndir og fjallað um þær.
Hefurðu skoðað leiðbeiningarblöðin sem heimasíða námskeiðsins vísar á? Þau reynast mörgum gagnleg við úrlausn verkefnisins.
©2008–2009 Guðmundur B. Arnkelsson (17. september 2009)