Eftirfarandi upplýsingar eru gefnar með venjulegum fyrirvara. Við samningu prófsins geta orðið breytingar frá neðangreindri lýsingu. Lýsingunni er þó ætlað að gefa sem réttasta mynd af prófinu og styðja þannig við þig í prófundirbúningnum.
Samkvæmt upplýsingum frá prófstjóra hefst prófið stundvíslega kl. 1330 og lýkur stundvíslega kl. 1630 föstudaginn 7. maí næstkomandi. Próftími er 3 klukkustundir.
Upplýsingar um prófstað eru birtar á vefnum. Gættu þess að leita nýjustu upplýsinga 1–2 dögum fyrir próf.
Prófið er tvískipt. Annars vegar eru fyrirhugaðar 10–12 efnisspurningar og hins vegar 2–3 reikningsdæmi. Efnisspurningar munu gilda samtals 70% af prófinu en dæmin 30%.
Efnisinntak er svipað og á hlutaprófunum tveimur. Einnig er reynt að hafa þyngd lokaprófsins áþekka og á hlutaprófunum.
Stoðkverið gefur góða mynd af prófverkefnum. Nánari upplýsingar eru í Spurt og svarað undir: Hvað þarf að reikna mörg dæmi fyrir prófið?
Efnisspurningar geta tekið yfir mjög misjafnt efni. Þær geta verið beint úr bókinni eða úr fyrirlestrum eða umræðum í tíma. Það geta kallað eftir staðreyndaþekkingu, skilningi, beitingu eða dæmareikningi. Í síðasttalda tilfellinu verða útreikningar þó það einfaldir að hægt er að setja gefnar upplýsingar beint inn í viðeigandi formúlur. Þú getur þurft að lesa úr gögnum, segja fyrir um tengsl, bera saman einhverjar mælitölur eða eiginleika þeirra, svo fátt eitt sé nefnt.
Efnisspurning getur verið stuttsvarsspurning, þ.e. spurning um afmarkað efni sem er hægt að svara í fáeinum setningum.
Efnisspurning getur líka verið á formi fjölvalsspurningar eða röð tvívalsspurninga þar sem (1) tilgreina þarf rétta(n) lið(i) (2) rökstyðja hvers vegna réttir liðir eru réttir og (3) hvers vegna rangir liðir eru rangir.
Að síðustu getur efnisspurning falist í því að lýsa mynd eða töflu. Þá má búast við að gefin séu upp ákveðin hugtök sem nota ber við lýsingu myndarinnar eða töflunnar. Gefið er rétt fyrir rétta notkun hugtaks sem lýsingu á myndinni eða töflunni; ekki er gefið rétt fyrir skilgreiningu á viðkomandi hugtaki án beinna tengsla og skírskotunar til þess sem sést á myndinni eða töflunni.
Reikningsdæmin verða með hefðbundnum hætti samanber yngri verkefni Stoðkvers. Leitast verður við að hafa reikningsdæmi sem umfangsminnst þannig að ekki strandi á sjálfri handavinnunni við úrlausn hennar heldur raunverulegri kunnáttu og færni. Gerðu ráð fyrir að þurfa að velja sjálf þær mælitölur og þau tölfræðipróf sem á að beita. Þú munt einnig þurfa að túlka niðurstöður dæmanna, bæði hvað hún þýðir tölfræðilega en einnig efnislega merkingu hennar.
Greinargóða lýsingu á námsefni má finna í námskeiðslýsingu námskeiðsins og í sambærilegum námslýsingum fyrir fyrsta, annan og þriðja þriðjung námskeiðsins.
Þú þarft að hafa með þér reiknivél og hafa öðlast nauðsynlega kunnáttu og þjálfun í notkun hennar. Reiknivélin þarf að geta reiknað kvaðratrót og sett tölur í annað veldi.
Önnur hjálpartæki eru óheimil. Sérstaklega skal tekið fram að óheimilt er að hafa kennslubækur, Stoðkver, minnismiða, tímaglósur eða önnur slík gögn.
Með prófinu færðu formúlublöð í fyrsta, öðrum og þriðja þriðjungi, sömu blöðin og þú getur nálgast á heimasvæði námskeiðsins.
Lokaprófið vegur 60–75% af lokaeinkunn námskeiðsins eftir vægi hlutaprófa. Hærra hlutaprófið vegur 15%; lægra prófið vegur einnig 15% ef það hækkar námskeiðseinkunn þína en annars vegur það 0%. SPSS próf vegur ætíð 10%.
© 2004 Guðmundur B. Arnkelsson